اسمي إسراء زين بساعد و بدرب البنات و الستات على تعلم التنظيم و التخطيط بشكل عملي و تطبيقي نقدر فعلا ننفذه على أرض الواقع مش مجرد أمنيات و خطط على ورق. و لأني أم معلمة منزليا مع حبي للتنظيم و التخطيط خلاني أتعلم كتير فيما يخص تنظيم و تخطيط العملية التعليمية و بدأت أساعد أمهات كتير غيري على استقرار العملية التعليمية بالتخطيط ليها بصورة صحيحة و تنظيم ما يخصه و تنفيذه بشكل واقعي و متدرج. مدربة استشاريين تحفيزيين... بساعد معلمات و مدربات التربية الإيجابية اللي حابة تشتغل في مجال الدعم النفسي و حابيين يستغلوا قدرتهم على حسن الاستماع و النصح و مساعدة غيرهم في دعم الأم مع تقديم محتوى الورش المعتاد... من خلال التدريب المعتمد للاستشارين التحفيزين و التفاصيل قريبا إن شاء الله. أما مجال التربية فكان جانب أساسي في رحلتي كأم قدمت فيه العديد من الورش و مازالت رحلة التعلم مستمرة. ليه بشتغل و باعمل اللي باعمله؟ لأني مؤمنة إن الرزق من العلم و المهارات تكليف قبل ما يكون تشريف لازم نساعد بيه و ننفع به قدر المستطاع. و لأني تخبطت كتير في التجارب حبيت أختصر على أي حد بدأ بعدي وقت و جهد و توجهم للتطوير و للأهداف الأهم. ازاي أقدر أساعدك؟ بساعدك تصححي مفاهيم كتير عن نفسك و عن التنظيم... إنك تحطي أهداف واقعية و تظبطي توقعاتك... و إن كل دا يصب في التطبيق العملي و مع تطبيقك و إلتزامك باللي نتعلمه و دورك في تنفيذه تقدري تلمسي تغيير حقيقي في حياتك مش مجرد كلام حلو على الورق و بس غير قابل للتنفيذ... إن شاء الله رب العالمين.